پارێزگه‌رێ دهوكێ سه‌رپه‌رشتیا كومبوونه‌كا تایبه‌ت سه‌باره‌ت كێمكرنا بهایێ كه‌ل و په‌ل و كرێیێن خانیا و ڤه‌گوهاستنێ كر

  ئه‌ڤرۆ فه‌رهاد ئه‌مین ئه‌تروشى پارێزگه‌رێ دهوكێ سه‌رپه‌رشتیا كومبوونه‌كا تایبه‌ت سه‌باره‌ت كێمكرنا بهایێ كه‌ل و په‌ل و كرێیێن خانیا و ڤه‌گوهاستنێ وخزمه‌تێن دى كر.
دكومبوونێ دا محمد ئه‌مین شه‌ره‌فانى, سه‌روكێ دادگه‌ها دهوك و فه‌هیم عه‌بدولا, سه‌روكێ جڤاتا پارێزگه‌ها دهوكێ و هه‌مى رێڤه‌به‌رێن په‌یوه‌ندیدار د به‌رهه‌ڤبوون.
ل ده‌ستپێكێ پارێزگه‌رێ دهوكێ دیار كر كو بابه‌تێ كێمكرنا بهایان و كرییا گه‌له‌ك یا گرنگه‌ و گرێداى ژیانا رۆژانه‌ یا وه‌لاتیانه‌ , له‌وما پێدڤیه‌ ب رژدى كار ل سه‌ر بهێته‌ كرن و ئاماژه‌ كره‌ وان كومبوون و هه‌ڤدیتنێن هاتینه‌ كرن به‌رى نوكه‌ ل سه‌ر به‌رهه‌ڤكرنا هژماره‌كا پێشنیار و بوچوونا, لدویڤدا ئه‌و پێشنیار و بوچوون دیار كرن و سه‌كته‌ر سه‌كته‌ر هاتنه‌ به‌رچاڤكرن و رێژا كێمكرنێ ئه‌وا هاتیه‌ پێشنیار كرن بو هه‌ر سه‌كته‌ره‌كى دیار كر مینا كریێن خانى و ئاڤاهیان و خزمه‌تێن ناف شقێن ئاكنجیبونێ, سه‌كته‌رێ سوته‌مه‌نیێ پانزین و گازوایل و گازا سپى و غاز, سه‌كته‌رێ كه‌ره‌ستێن خوارنێ هه‌مى كه‌ره‌ستێن خارنێ, سه‌كته‌رێ ساخله‌میێ و خزمه‌تێن نوشدارى و كلینیك و تاقیگه‌ها , سه‌كته‌رێ ڤه‌گوهاستنێ و كریێن ترومبیلا هه‌روه‌سا سه‌كته‌رێ بهایێ كاره‌با موه‌لیدا و  پێشنیارا دانانا بهایى ل سه‌ر هه‌مى كه‌ل و په‌لێن ل ناف بازارى دهێنه‌ فروتن .
پشتى به‌رجاڤكرنا ڤان سه‌كته‌را و رێژا كیمكرنێ ئه‌وا بو هاتیه‌ پبَشنیاركرن, گه‌نگه‌شه‌ ژلایێ به‌رهه‌ڤبوویان ڤه‌ هاته‌ كرن ژبو وێ چه‌ندێ خه‌لك پتر مفاى ببینیت و ئه‌و بریارێن دهێنه‌ دان برێكێن یاسایى بیت, بریاره‌ سبه‌هى هه‌ما كومبوون بهێته‌ كرن و تێدا هژماره‌كا بریارا بهێنه‌ دان.

2016-02-24
2303