وه‌حیدا یاقو : مه‌ باوه‌رى ب به‌غدا نه‌مایه‌ ،مه‌ دڤێت رێفراندوم لده‌ڤه‌رێن مه‌سیحییان ژى بهێته‌كرن

ئه‌ندامه‌كا په‌رله‌مانێ كوردستانێ راگه‌هاند نوكه‌ ده‌مه‌كێ گه‌له‌كێ گونجایى یه‌ ژ بو كو ریفراندوم ل هه‌رێما كوردستانێ بهێته‌كرن و گه‌لێ كورد و پێكهاتێن هه‌رێمێ بریارا خۆ بده‌ن. دوپات ژى كر كو وان وه‌كى پێكهاتا سریان و ئاشورى و كلدان باوه‌رى ب حكومه‌تا ناڤه‌ندى یا عیراقێ نه‌مایه‌.
وه‌حیدا یاقو هورمز ئه‌نداما په‌رله‌مانێ كوردستانێ ل سه‌ر لیستا كلدان سریان ئاشورى بو مالپه‌رێ فه‌رمیێ پارتى دیموكراتى كوردستان گوت ئه‌م پشتگریێ ل پێنگاڤ و په‌یامێن سه‌روك بارزانى دكه‌ین بو ئه‌نجام دانا ریفراندومێ ل هه‌رێما كوردستانێ.
وه‌حیدا یاقو هورمز د وێ باوه‌ریێ دایه‌ كو نوكه‌ ده‌مه‌كێ گه‌له‌ك گونجایى یه‌ رفراندوم ل هه‌رێما كوردستانێ بهێته‌ كرن و گه‌لێ كورد و پێكهاتێن هه‌رێمێ بریارا خو بده‌ن گوت ژى مه‌ هه‌میان دیت ده‌مێ كو شاندێ بلندێ حكومه‌تا هه‌رێما كوردستانێ سه‌ره‌دانا به‌غدا كرى نه‌گه‌هشتنه‌ چ رێكه‌فتنان دگه‌ل ده‌ستهه‌لاتدارێن به‌غدا یا رونه‌ ژى كو به‌غدا ل دویڤ داخوازیێن خه‌لكێ هه‌رێما كوردستانێ ناهێت له‌وما مه‌ چ باوه‌ریه‌ك ب حكومه‌تا ناڤه‌ندى نه‌مایه‌ هه‌ر ژبه‌ر ڤێ چه‌ندێ یه‌ ژى ئه‌م وه‌ دبێژین.
وێ نوینه‌را كلدان سریان ئاشورى ل په‌رله‌مانێ كوردستانێ دوپات كر كو نوكه‌ باشترین ده‌مه‌ بو ئه‌نجامدانا ریفراندومێ ل هه‌رێما كوردستانێ هه‌روه‌سا داخواز دكه‌ین ریفراندوم ل ده‌شتا نه‌ینه‌وا و هه‌مى وان  ده‌ڤه‌رێن مه‌سیحى تێدا ئاكنجى بهێته‌كرن كو ڤه‌گه‌رنه‌ سه‌ر هه‌رێما كوردستانێ.

2016-02-20
2256