مه‌كته‌با سیاسى یا پارتى سالروژا دامه‌زراندنا ئێكه‌تیا لاوێن دیموكراتا كوردستانێ پیروزكر

ب هه‌لكه‌فتا شێست و سێ سالیا دامه‌زراندنا ئێكه‌تیا لاوێن دیموكراتا كوردستانێ, مه‌كته‌با سیاسیا پارتى دیموكراتى كوردستان په‌یامه‌كێ پێشكێش دكه‌ت ئه‌ڤه‌ ژى ده‌قێ وێ یه‌:
به‌رێزان سكرتێر و ئه‌ندامێن مه‌كته‌با سكێرتارییه‌ت و هه‌ڤالێن جڤاتا سه‌ركردایه‌تیا ئێكه‌تیا لاوێن دیموكراتا كوردستانێ, ب هه‌لكه‌فتا شێست و سێ سالیا دامه‌زراندنا ئێكه‌تیا هه‌وه‌ یا خه‌باتگێر, پیروزباهیێن گه‌رم ل هه‌وه‌ و كادر و ئه‌ندامێن رێكخراوا هه‌وه‌ و گشت لاوێن كوردستانێ دكه‌ین, هیڤیدارین هه‌رده‌م د كارنامه‌ و چالاكى و بزاڤ و خه‌باتا خو دا د سه‌ركه‌فتیبن و پێنگاڤێن داهێنه‌رانه‌تر پاڤێژن و ده‌ستكه‌فتێن زێده‌تر بو ته‌خا لاوان و جڤاكێ مه‌ بده‌ستڤه‌بینن, جهێ شانازیێ یه‌ بدرێژاهییا خه‌باتا بێ راوه‌ستیان, ئێكه‌تیا لاوان شیایه‌ وه‌ك رێكخراوه‌كا گرنگ كۆمكه‌را هێز و شیانێن لاوان بیت و ده‌ستهه‌لاتا كارى و چالاكیێن وان به‌رفره‌هتر لێ بهێت, هه‌رده‌م بزاڤ كرینه‌ درژد بن ل سه‌ر بجهئینانا به‌رنامه‌ و پروگرامێن خو و ل سه‌ر ئاستێ كوردستانێ و ده‌ڤه‌رێ روله‌كێ ژ هه‌ژى و چالاكتر ببینن د بجهئینانا هیڤى و ئارمانجێن ره‌وایێن لاوان و هه‌روه‌سا ملله‌تێ مه‌. د مه‌یدانا كار و قوربانیدانێ دا رول و پێگه‌ها ته‌خا به‌رفره‌ها گه‌نج و لاوان مل ب ملێ ته‌خ و چینێن دیتر ناهێته‌ ئینكاركرن, هه‌ر ژبه‌ر ڤێ چه‌ندێ شوین تبلێن وان د هه‌مى بیاڤاندا یا روهن و به‌رچاڤه‌, ژ رویێ پشته‌ڤانیا ڤێ ته‌خا گرنگ د هوشیاركرنێ دا ژ پێخه‌مه‌ت ئاڤاكرنا جڤاكه‌كێ ساخله‌م و به‌رهه‌مدار و دویر ژ ره‌فتار و هزرێن توند و تیژیێ و تێكدانێ, بو بده‌ستڤه‌ئینانا پاشه‌رۆژه‌كا گه‌ش و به‌خته‌وه‌ر بو لاوان د ڤێ رێكێ ژى دا بده‌هان سه‌ركرده‌ و سیاسه‌تمه‌دار و كه‌سایه‌تیێن ژێهاتى د رێكخراوا هه‌وه‌دا هاتینه‌ پێگه‌هاندن, جهێ ئاماژه‌ پێكرنێ یه‌ قوناغا ئه‌ڤرۆ یا هه‌رێما كوردستانێ زێده‌تر پێدڤى ب بزاڤ و خه‌بات و هێز و شیانێن هه‌وه‌نه‌, وه‌ك شویرهه‌كا پیلاى و گه‌هێن خوینا ملله‌تى نه‌ مل ب ملێ پێشمه‌رگێ قه‌هره‌مان ڤه‌ خه‌باتێ دكه‌ن بو به‌رسینگگرتنا گه‌فێن تیرورست و نه‌حه‌زێن ملله‌تێ كورد و داكوكیكرن ل سه‌ر ئه‌زموون و ده‌ستكه‌فتێن مه‌ یێن ئه‌ڤرۆ, هه‌روه‌سا ده‌ربازبوون ژ ڤێ قوناغێ و بده‌ستڤه‌ئینانا پاشه‌رۆژه‌كا باشتر و گه‌شتر بو ملله‌تێ مه‌.
دڤێ هه‌لكه‌فتێ دا جاره‌كادى پشته‌ڤانیا خو یا تمام بو هه‌وه‌یێن لاوێن دیموكراتخواز دووپاتدكه‌ین و هیڤیدارین هه‌رده‌م پێشه‌نگ و به‌ره‌ڤ پێش بن بو بده‌ستڤه‌ئینانا گشت ئارمانجێن ملله‌تێ كورد, سلاڤ ل گیانێ پاقژێ وان شه‌هیدێن نه‌مر یێن كو د رێكا سه‌رفه‌رازییا ئێكه‌تیا لاوان دا گیانێ خو به‌خشى, سلاڤ ل شێست و سێ سالیا خه‌باتا هه‌وه‌ یا پرى ده‌ستكه‌فت, هه‌ر سه‌ركه‌فتیبن.
مه‌كته‌با سیاسیا پارتى دیموكراتى كوردستان. 

 

2016-02-17
2361