مه‌كته‌با سیاسى یا پارتى سالروژا دامه‌زراندنا ئێكه‌تیا قوتابیێن كوردستانێ پیروزكر

مه‌كته‌با سیاسیا پارتى دیموكراتى كوردستان ب هه‌لكه‌فتا روژا دامه‌زراندنا ئێكه‌تیا قوتابیێن كوردستانێ د په‌یامه‌كێ دا پیروزباهى ل هه‌مى ئه‌ندام و كادرێن رێكخراوان و سه‌رجه‌م قوتابییان كرن  ئه‌ڤه‌ ژى ده‌قێ په‌یامێ یه‌.
به‌رێزان سكرتێر و ئه‌ندامێن مه‌كته‌بێن سكێرتارییه‌ت و هه‌ڤالێن لیژنێن ئێكه‌تیا قوتابیێن كوردستانێ .
ب هه‌لكه‌فتا شێست و سێ سالیا دامه‌زراندنا ئێكه‌تیا قوتابیێن كوردستانێ گه‌رمترین پیروزباهیان ل هه‌مى قوتابى و هه‌مى كادر و ئه‌ندامێن رێكخراوا وان و سه‌رجه‌م قوتابیێن كوردستانێ دكه‌ین هیڤدارین هه‌مى ده‌مان د سه‌ركه‌فتى بن و د بزاڤ و كار و چالاكى و پێنگاڤێن به‌رهه‌مدارتر دا بن بو بده‌ستڤه‌ئینانا زێده‌تر , هه‌رده‌م د خزمه‌تا زانست و پێشكه‌فتن و نویخوازیێ دا بن .
جهێ شانازیێ یه‌ ئێكه‌تیا هه‌وه‌ به‌رى شێست و سێ سالان هاتیه‌ دامه‌زراندن و شیاینه‌ د وى پێگه‌هێ گرنگدا ب به‌رنامێن ده‌وله‌مه‌ند و پێشكه‌فتنێن خو كو شوینكه‌فتیێن قوتابخانا كوردایه‌تى و رێبازا پیروزا بارزانینه‌ د هه‌مى قوناغێن خه‌بات و تێكوشینا گه‌لێ مه‌ و بزاڤا رزگاریخواز و شوره‌شگێرى و سیاسى دا روله‌كێ دیار و به‌رچاڤ ببینن هه‌روه‌سا ل سه‌ر ئاستێ نافخو و هه‌رێمى و جیهانى دا روله‌كێ دیار و گاریگه‌ر ببینن و د ڤان كاران دا ب ده‌هان سه‌ركرده‌ و كادرێن ژێهاتى بو سه‌ر گوره‌پانا خه‌بات و تێكوشینێ به‌رهه‌ڤكرینه‌ .
یا ئاشكرا و رونه‌ كو ته‌خه‌كا به‌رفره‌ها قوتابییان ئه‌رك و كاره‌كێ ب بها و گرنگ ب ستویێ خوڤه‌ گرتیه‌ ب تایبه‌ت د قوناغا چاره‌نڤیسسازا ئه‌ڤرو دا مل ب ملێ بزاڤێن گه‌ل و پێشمه‌رگێ قه‌هره‌مان و دلسوز و خوراگرێ سه‌رێ رمێ روى ب روى بیرو بوچوون و هزر و توند و تیژى و بزاڤ و هێرشێن تیرورستان بووینه‌ بو پاراستنا ده‌ستكه‌فتان و ره‌وشا ئارام و سه‌قامگێرا هه‌رێما كوردستانێ دویماهیك ئینانا كێشه‌ و گرفتان .
جاره‌كا دى ب ڤێ هه‌لكه‌فتێ پشته‌ڤانیا خو بو وه‌ و ئێكه‌تیا وه‌ دووپات دكه‌ین و هیڤیدارین هه‌رده‌م جهێ باوه‌ریا ملله‌تێ مه‌بن و پێشه‌نگێن بزاڤا قوتابیێن كوردستانێ بن بو بده‌ستڤه‌ئینانا هیڤى و داخوازیێن ره‌وا .
سلاڤ ل گیانێ پاقژێ شه‌هیدێن ئه‌ڤرو د رێكا سه‌روه‌ریا ئێكه‌تیا هه‌وه‌ و مافێن ملله‌تێ مه‌ دا گیانێ خو به‌خشى .
سلاڤ ل شێست و سێ سالیا خه‌باتا وه‌بن هه‌ر د سه‌ركه‌فتى بن .
مه‌كته‌با سیاسى پارتى دیموكراتى كوردستان

2016-02-17
2300