2008/11/05

دهوك ... پێشوازیا بالیوزا كه‌نه‌دا ل ئێراقێ

ئه‌ڤرو سپێدێ 5/11/2008 ( ته‌مه‌ر ره‌مه‌زان ) پارێزگه‌رێ دهوكێ پێشوازیا ( مارگرێت ) بالیوزا كه‌نه‌دا ل ئێراقى و شاندێ دگه‌لدا كر،

دهه‌ڤدیتنه‌كێ دا به‌حسێ به‌رنامێن كارگێریا پارێزگه‌ها دهوكێ یێن ئاڤاكرن و بجهئینانا پروژێن خزمه‌تگوزارى و ستراتیژى و كێم وكاسیێن ده‌ڤه‌رێ ژلایێ پروژێن ئاڤێ و كاره‌بێ هاته‌ كرن ،

پارێزگه‌رێ دهوكێ ئاماژه‌ كره‌ به‌رنامێن چاره‌كرنا ڤان كێم و كاسیان و دانانا هنده‌ك كارگه‌هێن مه‌زن و ئاماژه‌ كره‌ وێ چه‌ندێ كو پارێزگه‌ها دهوكێ یا نافداره‌ ب چاندنێ و گه‌شت و گوزاریێ و حكومه‌تا هه‌رێمێ پلانه‌كا ستراتیژى بو پێشڤه‌برنا كه‌رتێ چاندنێ دانایه‌ و بریاره‌ دسالا 2009 ێ دا ده‌ست پێ بهێته‌ كرن ، دیسا به‌حسێ دانانا ده‌ڤه‌ره‌كا بازرگانیا ئازاد ل سنورێ قه‌زا زاخو و چێكرنا فروكه‌خانه‌كێ ل دهوكێ كر ، و ته‌ئكید لسه‌ر هاندنا كومپانى و سه‌رمایه‌دارێن كه‌نه‌دى كر كو پشكداریێ دئاڤاكرنا ده‌ڤه‌رێ دا بكه‌ن و پروژێن به‌رهه‌م هێنه‌ر بجه بینن و هه‌مى ئاسانكارى و هه‌فكاریا كارگێریا پارێزگه‌هێ بو ڤێ چه‌ندێ دوپاتكر ،

ژلایێ خوڤه‌ بالیوزا كه‌نه‌دا خوشحالیا خو بو پێشكه‌فتن و پێشڤه‌چونا ل كوردستانێ بگشتى و پارێزگه‌ها دهوكێ ب تایبه‌تى و ته‌ناهیا هه‌ى دیاركر و هیڤى خواست پێشكه‌فتنا كوردستانێ یا به‌رده‌وام بیت و سوز دا كو بزاڤێ بكه‌ت بو هاندانا كومپانى و سه‌رمایه‌دارێن كه‌نه‌دى پشكداریێ دپروژێن به‌رهه‌م هێنه‌ر دا ل كوردستانێ و پارێزگه‌ها دهوكێ ب تایبه‌تى و دیار كر كو بارێ ئێمناهیێ یێ هاریكاره‌ بو هندێ كومپانیێن مه‌ پشكداریێ دئاڤاكۆرنا كوردستانێ دا بكه‌ن.