ێڤی
سه‌روكێ هه‌رێما كوردستانێ دگه‌ل جڤاتا دادوه‌رى و ده‌سته‌یا ده‌ستپاكى و دادوه‌ریا ڤه‌كولینا و دیوانا چاڤدێریا دارایى یا هه‌رێما كوردستانێ كومبوو

 ئه‌ڤرو ل سه‌لاحه‌دین رێزدار مه‌سعود بارزانى سه‌روكێ هه‌رێما كوردستانێ ب مه‌به‌ستا به‌حسكرن و شیره‌تكرنێ بو بجهئینانا بریار و دانانا میكانیزمان سه‌باره‌ت پروسێسا چاكسازیێ دگه‌ل جڤاتا دادوه‌رى و ده‌سته‌یا ده‌ستپاكى و دادوه‌ریا ڤه‌كولینا ده‌ستپاكیا سه‌رجه‌م باژێر و باژێركێن كوردستانێ و دیوانا چاڤدێریا دارایى یا هه‌رێما كوردستانێ كومبوو .د كومبوونێ دا سه‌روك بارزانى د په‌یڤه‌كێ دا به‌حسێ پێدڤیا چاكسازیا و روى ب روى بوونا گه‌نده‌لیێ و هه‌روه‌سا مه‌ترسیا به‌لاڤبوونا گه‌نده‌لیێ و ب هه‌ده‌ردانا سامانێ گشتى ل سه‌ر سه‌قامگێرى و داهاتێ وه‌لاتى كر و پشته‌ڤانیا خو یا تمام راگه‌هاند بو دادوه‌ر و ئه‌ندامێن ده‌سته‌یا ده‌ستپاكى و دیوانا چاڤدێریا دارایى نیشان دا و ته‌ئكید ل سه‌ر وێ چه‌ندێ كر كو ئه‌ركێ روى ب روى بوونا گه‌نده‌لیێ و ده‌ستپێكرنا چاكسازیا ئه‌ركه‌كێ نشتیمانى یێ پیروزه‌ و داخوازیا هه‌مى خه‌لكێ كوردستانێ و پشته‌ڤانیێ لێ دكه‌م . سه‌روك بارزانى ئه‌ڤ چه‌نده‌ دووپاتكر كو د وێ پروسێسێ دا نابیت چ كه‌س و لایه‌نه‌ك د چ پله‌ و پوسته‌كى دا بیت بهێته‌ استپنائكرن و نابیت كه‌س ژ لێپرسینێ بهێته‌ دویركرن و بو ڤێ مه‌ره‌مێ ژى هه‌مى شیانێن خو دێ ته‌رخان كه‌ت كو ده‌ستهه‌لاتا دادوه‌رى و ده‌سته‌یا چاڤدێریا كوردستانێ بشێن ب باشترین رێك پروسێسا چاكسازیێ بجه بینن .د درێژاهیا په‌یڤێن خودا سه‌روك بارزانى ئه‌ڤ چه‌نده‌ به‌رچاڤ كر كو ئه‌و وه‌لات دێ یێ سه‌رفه‌راز بیت ئه‌وێ دادپه‌روه‌رى تێدا دهێته‌ بنه‌جهكرن و ده‌ستهه‌لاتا دادوه‌رى و قانونا سه‌روه‌ر بیت , سه‌روك بارزانى ئه‌و چه‌نده‌ ژى دیار كر كو چ كه‌س ژ چاره‌نڤیس و ئیرادا ملله‌تى بلندتر نینه‌ و ملله‌تى ژى دادپه‌روه‌رى و چاكسازى دڤێت و چاره‌نڤیسێ مه‌ژى ب چاكسازیان ڤه‌ یێ گرێدایه‌ , سه‌روك بارزانى ئاماژه‌ ب وێ چه‌ندێ دا كو دادوه‌ر و ده‌زگه‌ه و ده‌سته‌یا چاڤدێریا هه‌رێما كوردستانێ ب هه‌ڤكارى دگه‌ل سه‌روكاتیا هه‌رێمێ و حكومه‌تى دێ پروسێسا چاكسازیێ بجه ئینن و راگه‌هاند بو سه‌رئێخستنا ڤێ پروسێسێ دێ

پشته‌ڤانیه‌كا تمام ژێ كه‌م و دێ دگه‌ل وان بیت و دێ ل به‌رامبه‌ر هه‌ر كه‌سه‌كى راوه‌ستیت كو ئاسته‌نك و ئالوزیان بێخیته‌ د رێكا پروسێسا چاكسازیێ دا یان ژى بریارێن چاكسازیێ بجه نه‌ئینیت د به‌رامبه‌ر ده‌ستهه‌لاتا دادوه‌رى و ده‌زگه‌هێن چاڤدێرى و دادوه‌رێن ده‌سته‌یێن ده‌ستپاكیێ ل هه‌مى باژێرێن هه‌رێما كوردستانێ و سوز دا كو پروسێسا چاكسازیێ بجه بینن و بریارێن چاكسازیێ یێن سه‌روك بارزانى بنه‌جه بكه‌ن و یا د شیانا وان دا بیت خه‌مساریێ تێدا نه‌كه‌ن بو سه‌رئێخستنا پروسێسا چاكسازیێ و داخواز كر كو سه‌روك بارزانى پالپشت و پشته‌ڤانێ وانبیت .پشكدارێن كومبوونێ به‌حسێ وان ئاسته‌نگان كر یێن د كه‌ڤنه‌ د رێكا پروسێسا چاكسازیێ دا و سه‌روك بارزانى ل سه‌ر وان ئالوزى و ئاسته‌نگان ئاگه‌هدار كر و داخوازا كار ئاسانیێ و هه‌ڤكاریێ د گه‌ل لایه‌نێن په‌یوه‌ندیدار كر هه‌روه‌سا چه‌ندین پێشنیار و پێنگاڤێن عه‌مه‌لى بو بجه ئینانا پروسێسا چاكسازیێ به‌رچاڤ كرن و د ڤى بیاڤى دا چه‌ندین بریارێن پێدڤى هاتنه‌ دان .

2016-03-01
2218
ی
ڤ ی یێ 07504934005
Copyright Duhok TV 1992 - 2014, All rights Reserved. Developed by: Galwan Khalid