ێڤی
مه‌سرور بارزانى : رێفراندوم دێ باشترین به‌لگه‌ بیت بو دیاركرنا داخوازیێن خه‌لكى

مه‌سرور بارزانى شیره‌تكارێ جڤاتا ئاسایشا نیشتیمانى یا كوردستانێ راگه‌هاند ئه‌نجامێ رێفراندومێ باشترین به‌لگه‌یه‌ بو دیاركرنا حه‌زا خه‌لكێ كوردستانێ.د هه‌ڤپه‌یڤینه‌كێدا دگه‌ل گوڤارا گولان مه‌سرور بارزانى دبێژیت : سه‌یره‌ هنده‌ك كه‌س دبێژن ده‌م یێ گونجاى نینه‌ بو رێفراندومێ ، چاوا ده‌م یێ گونجاى نینه‌ بو وێ چه‌ندێ خه‌لك بێژن چ دڤێت ؟ ئه‌نجامێ رێفراندومێ باشترین به‌لگه‌یه‌ بو دیاركرنا حه‌زا خه‌لكێ كوردستانێ، ئه‌ڤه‌ بریاره‌كا ئێكلاكه‌ره‌ و هه‌مه‌لایه‌نه‌، سه‌ركردایه‌تى پێگیرى بریارێن خه‌لكى یه‌ و لسه‌ر بنه‌مایێ بریارا پتریا خه‌لكێ كوردستانێ دێ هێته‌ كرن.مه‌سرور بارزانى ئاشكرا ژى كر: كو یا گرنگه‌ رێفراندوم ببیته‌ ئه‌گه‌رێ ئێكرێزیا ناڤمالا كوردان، دڤێت ده‌ستكه‌فتێن نیشتیمانى ژى بو هه‌مى لایه‌كێ هه‌بیت، هه‌مى لایه‌نێن سیاسى گرنگیه‌كا زێده‌تر ب به‌رژه‌وه‌ندیێن بلند یێن نیشتیمانى بده‌ن و بتنێ هزر د ململانێن سیاسى و به‌رفره‌هكرنا پێگه‌هێ خو نه‌كه‌ن.د پشكه‌كا دى یا هه‌ڤدیتنێ دا شیره‌تكارێ جڤاتا ئاسایشا نیشتیمانى یا كوردستانێ دبێژیت : سه‌ربه‌خویى مافه‌كێ سروشتى یێ گه‌لێ مه‌یه‌ و كه‌س ڤى مافى ناده‌ته‌ مه‌، به‌لكو یێ ژ مه‌ ستاندى و پێدڤیه‌ هه‌ر ده‌مێ ده‌رفه‌ت هه‌بوو ڤى مافى بكاربینین، نوكه‌ گه‌له‌ك ژ وه‌لاتێن جیهانێ دانپێدانێ ب وێ چه‌ندێ دكه‌ن كو غه‌دره‌كا دیروكى ل خه‌لكێ كوردستانێ هاتیه‌ كرن، وه‌كى هه‌مى خه‌لكێن جیهانێ مافێ دیاركرنا چاره‌نڤیسێ خو یێ هه‌ى.سه‌باره‌ت ره‌وشا هه‌رێما كوردستانێ و قه‌یرانا دارایى، مه‌سرور بارزانى ئاماژه‌ ب وێ چه‌ندێ دكه‌ت كو یا گرنگه‌ سیسته‌مه‌كێ ئابوورى یێ بهێز لسه‌ر بنه‌مایه‌كێ زانستى بهێته‌ دروستكرن و نه‌بتنێ خه‌لك یێ ئاگه‌هدار بیت به‌لكو پشكدار ژى بیت.دهه‌مان ده‌مدا دبێژیت: كێشا سه‌ره‌كى ئه‌وه‌ كو خه‌لك یێ ژ هه‌مى تشتا ئاگه‌هدار نینه‌ ، حكومه‌ت یا خه‌مساربوو ب وێ چه‌ندێ كو ب راستگویانه‌ هه‌مى كێشه‌ و ئالوزى و به‌رنامێ ئابوورى یێ خو وه‌كو پێدڤى نه‌گه‌هانده‌ خه‌لكى، پێدڤییه‌ حكومه‌ت د دارشتنا سیاسه‌تا ئابوورى دا بووچوونێن خه‌لكى ب گرنگ وه‌ربگریت.هه‌ر دوێ هه‌ڤدیتنێ دا مه‌سرور بارزانى، گوت : پارتى هه‌رده‌م كوردایه‌تى یا كرى و خو ب پارێزه‌رێ ده‌ستكه‌فتێن نیشتیمانى زانییه‌، پێدڤییه‌ دڤێ قوناغێ ژى دا هه‌مى بزاڤێ بكه‌ت بو پاراستنا ڤێ ئه‌زموونێ و پارێزگاریكرن ژ نه‌ته‌وه‌ و نیشتمانى, پێنگاڤێن گونجایى ژى ب هاڤێژن بو بده‌ستڤه‌ئینانا ده‌ستكه‌فتێن زێده‌تر, خواندنه‌كا ژیرانه‌ ژى هه‌بیت كو ل كیژ ده‌مى بریار بهێته‌ دان و پێنگاڤ بهێنه‌ هاڤێژتن.سه‌باره‌ت شه‌رى, شیره‌تكارێ جڤاتا ئاسایشا هه‌رێما كوردستانێ دبێژیت: ئوپراسیونێن هه‌ڤپشك كارتێكرنێن خو ل سه‌ر شكاندنا دوژمنى و وره‌یا وان هه‌بوویه‌, به‌لێ ژ وێ ژى گرنگتر ئاماژه‌یه‌ ب شیانێن هێزێن تایبه‌تێن مه‌ وه‌ك دژه‌ تیرور كو ل ئاسته‌كێ زور بلند دایه‌ و دێ شێن مل ب ملێ هێزێن هه‌ڤپشكێن ئه‌مریكا ئوپراسیونێن هویر و گرنگ ئه‌نجام بده‌ن.مه‌سرور بارزانى ئاشكرا دكه‌ت, به‌رده‌وام د هه‌مى په‌یوه‌ندیێن مه‌ دا            د گه‌ل هه‌ڤپه‌یمانێن مه‌, به‌حسێ پێدڤیێن چه‌كى و لوجستیكى و هاریكارى بو پێشمه‌رگه‌ى هاته‌كرن و ب شانازیڤه‌ ئه‌م شیاینه‌ به‌رهه‌مێ باش بده‌ستڤه‌ بینین, نوكه‌ پێدڤیێن هه‌ره‌ سه‌ره‌كى یێن پێشمه‌رگه‌ى مووچه‌ و میزانییه‌, ب دلگرانیڤه‌ نه‌بوونا بودجێ كارتێكرن كریه‌ سه‌ر ره‌وشێ و ئه‌گه‌ر پێشمه‌رگه‌ى ئیراده‌ نه‌بیت چ هێز نه‌شێن خو ل به‌ر ڤێ ره‌وشا گران بگرن.د بیاڤێ كێشێن هه‌لاویستى یێن دناڤبه‌را هه‌رێما كوردستانێ و به‌غدا دا, مه‌سرور بارزانى دبێژیت: پێدڤیه‌ به‌رپرسێن به‌غدا ل وێ چه‌ندێ تێبگه‌هن ماده‌م نه‌شێن كوردان وه‌ك هه‌ڤپشك و وه‌كهه‌ڤ ببینن, ئێدى ده‌مێ وێ چه‌ندێ یه‌ رێكێ بده‌ن ب خوشى و ئاشتیانه‌ ژ هه‌ڤ بهێینه‌ جوداكرن و ببین هه‌ڤپه‌یمانێن بهێز بو ئێك و دوو, د ئێك و دوو گه‌هشتن و رێككه‌فتن دگه‌ل عیراقێ حه‌ساسیه‌تا وه‌لاتێن ده‌ڤه‌رێ ژى دێ كێمتر لێ كه‌ت.هه‌روه‌سا شیره‌تكارێ جڤاتا ئاسایشا هه‌رێمێ رادگه‌هینیت كو پێدڤیه‌ دگه‌ل وه‌لاتێن دى ژى دان و ستاندن بهێنه‌كرن, گرنگ ئه‌وه‌ بشێین وه‌ك ملله‌ته‌ك ب ئێك هه‌لویست و ئێك بریار ڤێ چه‌ندێ ئه‌نجام بده‌ین, ماده‌م سیسته‌مێ فیدرالى و سیسته‌مێن دیترێن حكومرانیێ ل عیراقێ نه‌شیاینه‌ چاره‌سه‌ریا كێشێن مه‌ بكه‌ن, پێدڤیه‌ بو رێگرى كرن ل شه‌رى و مالوێرانیێ هزر د وێ چه‌ندێ دا بكه‌ین كو وه‌ك دوو جیران و هه‌ڤپه‌یمان دگه‌ل عیراقێ بژین و پێدڤیه‌ خه‌لكێ كوردستانێ بریارێ ل سه‌ر سیسته‌مێ حكومرانیێ و مافێ چاره‌نڤیسێ خو بده‌ت.  

2016-02-07
1936
ی
ڤ ی یێ 07504934005
Copyright Duhok TV 1992 - 2014, All rights Reserved. Developed by: Galwan Khalid